Telangana misses you sir

జయహొ జయహో నీకు జయశంకరా
తల్లి తెలంగాణ కన్నట్టి ఓ కీర్తి శేఖర  

అక్కంపేట ఆ ఆత్మకూరు ప్రాంతం
ఏనాడు చేసినా పుణ్యఫలమోగాని
ఆల్చిప్ప నొదిలేసి అలల లాలననొదిలి
ఆణిముత్యము ఒకటి ఈచోట చేరెను

అర్థశాస్త్రము చదివి ఆచార్యుడయ్యి
అర్థమే చేయించి అభ్యుదయ పరిచి
అర్థము పదవులను ఆశించకుండానె
అర్థవంతమైన జీవితమె గడిపితివి

ధనికుడు దళితుడు పేద బీదలు అంటు
అడ్డుగోడలు లేని ప్రేమనే పంచితివి
అసమానతల స్వార్థ కోరల్లొ చిక్కుకుని
నలిగిపోయే తల్లి విముక్తికై పోరితివి

క్యాన్సరే కబళించినా నిన్ను ఆచార్య
కాంక్షనే కబళించ సాధ్యమవునా అయ్య
నీలోని ఆశయము ప్రతి ఉసురులో చేర
నిస్వార్థ పోరాటమే చేసి నెగ్గెదము

జయహొ జయహో నీకు జయశంకరా
తల్లి తెలంగాణ కన్నట్టి ఓ కీర్తి శేఖర